Духоўныя практыкаванні адбыліся 6-7 снежня ў парафіі Маці Божай з Гвадэлупы ў Беластоку, дзе моліцца беларускае душпастырства.
Тэмай рэкалекцый была “Споведзь”. Іх правёў ксёндз з Беларусі Юры Рашатко, які цяпер служыць у Кракаве.
У першы дзень рэкалекцый адбылася святая Імша з казаннем для дзяцей. Да дзяцей і дарослых прыйшоў святы Мікалай і пачаставаў слодычамі.
У другі дзень святар сказаў канферэнцыю для дарослых на тэму, як варта і як не варта спавядацца. Удзельнікі закопвалі пытанні па тэме: прыкладам, ці варта нагадваць сваім дзецям падлеткавага ўзросту хадзіць да споведзі. Падчас іх рэкалекцыяніст нават звярнуўся па дапамогу да ChatGPT. Пасля прайшла адарацыя Найсвяцейшага Сакрамэнту і споведзь удзельнікаў рэкалекцый.
Завяршыліся два дні духоўных практыкаванняў раратняй святой Імшой. Падчас усіх рэкалекцый з удзельнікамі прысутнічаў душпастыр супольнасці ксёндз Гжэгаж Балеста. Ён адпраўляў святыя Імшы і спавядаў вернікаў.
Супольнасць каталікоў-беларусаў Беластоку выказвае падзяку ксяндзу Юрыю Рашатко за духоўны пажытак.
